ഗള്ഫ് മലയാളി ജീവിതത്തിന്റെ നേര്ക്കാഴ്ച്ചകളുമായി മിഡില് ഈസ്റ്റ് പനോരമ
അറേബ്യന് നാടുകളിലെ മലയാളി ജീവിതത്തിലേയ്ക്ക് ജാലകം തുറക്കുകയാണ് മിഡില് ഈസ്റ്റ് പനോരമ എന്ന ഗള്ഫ് ബെയ്സ്ഡ് പരിപാടിയിലൂടെ അമൃത ടിവി. പേര്ഷ്യന് ഗള്ഫ് രാജ്യങ്ങളിലെ മലയാളികളുടെ പുതിയ വിശേഷങ്ങളും വാര്ത്തകളുമായി
എല്ലാ വ്യാഴാഴ്ച്ചയും യുഎഇ സമയം രാത്രി 10.30ന് മിഡില് ഈസ്റ്റ് പനോരമ അമൃത ടിവിയില് സംപ്രേഷണം ചെയ്യും.
നിറപ്പകിട്ടാര്ന്ന പ്രവാസി ജീവിതക്കാഴ്ച്ചകള്ക്കപ്പുറം ചുട്ടുപഴുത്ത മണലാരണ്യങ്ങളില് ജീവിതം ഇഴച്ചുനീക്കേണ്ടി വരുന്ന മലയാളികളുടെ ജീവിതത്തിലേയ്ക്കുള്ള എത്തിനോട്ടമാണ് ഈ പരിപാടി. കുടുംബപ്രാരാബ്ധങ്ങള് അകറ്റാന് മറുനാട്ടിലേയ്ക്ക് ജീവിതം പറിച്ചുനടേണ്ടിവരുന്ന ഈ മലയാളി ജനത എപ്പോള് പുറത്താക്കപ്പെടുമെന്ന ഭീതിയോടെയാണ് ഗള്ഫ് നാടുകളില് നാളുകള് കഴിച്ചുനീക്കുന്നത്. പച്ചക്കറി കടകളിലും, മീന് മാര്ക്കറ്റുകളിലും മറ്റും ജോലി ചെയ്യുന്നവരുടെ ബുദ്ധിമുട്ടുകളും വിഷമതകളും പരിപാടി നമുക്ക് കാണിച്ചുതരുന്നു. പ്രവാസി ജീവിതത്തിന്റെ ഈ വിഷമതകള്ക്കിടയിലും മറ്റുള്ളവര്ക്ക് സഹായഹസ്തം നീട്ടുന്ന മറുനാടന് മലയാളികളെയും , മറുനാട്ടിലും കേരളഭൂമിയുടെ ഖ്യാതി പരത്തുന്ന മലയാളികളുടെ നേട്ടങ്ങളും അഭിവൃദ്ധിയും പരിപാടി ചിത്രീകരിക്കും. സ്വന്തം നാടിനെക്കുറിച്ചുള്ള സ്വപ്നങ്ങളും നെഞ്ചിലേറ്റി മറുനാട്ടില് ജീവിതത്തിന്റെ നല്ലകാലം ഹോമിക്കേണ്ടി വരുന്ന മലയാളിജീവിതത്തിന്റെ നേര്ച്ചിത്രം തരികയാണ് മിഡില് ഈസ്റ്റ് പനോരമ. |
